Apuntes dun crítico malandante (I): Pazo de Familia

Un intento fracasado de facerlle unha reseña ao último de Pazo de Familia (que xa nin sequera é o último)

Hai dúas semanas, eu tiven a brillante idea de escribir unha crítica do último capítulo de Pazo de Familia, o especial ‘Ti decides o final’, aínda que -xiro na trama- nunca vira esa serie na miña vida. Ía comezar así:

pazo de familia
O elenco de Pazo de Familia (foto: eldiario.es)

“Viches os primeiros 109 capítulos de Pazo de Familia e non sabes se che paga a pena ver o capítulo 110?”

Como podedes apreciar, ía ser moi irónica e graciosa. Ha. Ha. Ha.

Pois non. Ao final, resulta que esa idea innovadora era unha estupidez, e até dá a impresión falsa de que eu teño algo en contra de Pazo de Familia. Non sei como se me ocorreu. O peor é que, a pesar de terme comprometido a escribir para A Que Cheira, Papá? con certa regularidade, o único que teño agora son os apuntes que tomei mentres vía o capítulo.

O que realmente tiña que facer era escribir sobre Fatmagül, a novela turca que botan cada día en Nova. Esa si que me ten enganchado, e o malo da serie chámase Erdogan, o cal é bastante gracioso. Porén, este blog é un magazine cultural GALEGO. ¿Oíste, neno? Que pinta aquí unha novela turca dobrada ao castelán? Nada, que eu saiba. Aquí o que hai que facer é versar sobre temas galegos, por exemplo sobre Mariano Rajoy e os pesadelos que o noso presidente tería se lese demasiado a Isaac Asimov.

Por dito motivo (non o de querer tratar temas galegos, senón o de non ter outra cousa escrita na miña libreta), preséntovos humildemente, e con non pouca vergoña, os meus apuntes de Pazo de Familia:

-O capítulo empeza con dúas persoas metidas na cama. A muller espértase xa maquillada. Será que ligaron cando saían de festa despois de ver xogar o Celta? (Isto é lóxico porque o Pazo Quiñones de León está ao lado de Balaídos). Din que ás súas familias non lles agradará esta unión. Espero que sexan felices. A muller di que non quere casar con el pero que tampouco ten porqué meterse nun convento (pero cóbrese coa saba para que o home non a vexa espida cando pasa ao cuarto de baño. Para que tanto pudor? Paréceme un comportamento algo monástico).

pazo
Eu no xardín do pazo no 2016. Decidín non quitar unha foto diante da fachada do pazo porque sería demasiado obvio. Agora estou arrepentido.

-Teño moitas preguntas. Como se chaman estas persoas? Comezar unha serie no capítulo 110 non será unha mala idea?

-Está chamando o pai da muller e o home -que finalmente se chama Alberto- colle o teléfono. Na próxima escena, o pai di que “non quero ver a Alberto coa miña filla nunca máis”. Que terá feito o Alberto para merecer iso?

-Aparece o avogado de Serramoura, que tamén (!) sae en Fariña. Estas series estarán ambientadas nun mesmo universo como as películas de Marvel? Será o mesmo avogado – as súas aventuras nos anos oitenta antes de mudarse a Serramoura, tipo Better Call Saul e Breaking Bad?

-Hai un home que comeu sen querer o seu anel de prometido ou de matrimonio. Toma unha laxativa para cagalo. Funciona demasiado rápido (lémbrame á miña viaxe á China). Non é da gran familia do pazo, senón que é un dos empregados que están aí de parola coas criadas. É como o teatro do Século de Ouro: os nobres viven intensos dramas, mentres os de abaixo son máis de comedia.

-Resulta que a muller da primeira escena, que se chama Claudia, non pode estar co Alberto porque as dúas familias están en guerra como en Xogo de Tronos.

-O señor ese nin sequera perdeu o anel. A súa muller teno na man, pero deixa que o home siga buscándoo. Gústame esta trama.

-Resulta que violaran a unha das criadas que se chama Rita. Esquecede o que dixen da comedia e o Século de Ouro.

-Ao final os pais de Claudia falan dunhas probas de ADN que se fixeron, e parece ser que a verdadeira propietaria do pazo ou é unha sueva ou é unha muller que se chama Suevia.

-Hai un home no cárcere que se chama Nino. Nalgún intre sae de novo o avogado de Serramoura e Fariña. Isto reforza a miña teoría de que todas estas series forman parte dunha mesma saga épica sobre o narcotráfico galego (terei que mirar se ese actor saíu en Matalobos tamén).

En conclusión, pídovos perdón por ser un auténtico cheiramerdas. Que conste que me gustou o que vin. Dito isto, prometo nunca volver a ter unha mala idea, como pretender criticar unha serie sen tela visto antes, ou non levar pastillas para a cagalera na miña viaxe á China.

Emítese Fatmagül todos os días ás 21:30 en Nova.

Fatmagül

 

 

1 COMENTARIO

DEIXA UN COMENTARIO

Por favor, introduce o teu comentario!
Por favor, introduce o teu nome aquí